Алгыстаах күн, үөрүүлээх түгэн!

Бүгүн — олунньу 13 күнүгэр Арктика оскуолатыгар Төрөөбүт тыл уонна Сурук-бичик күнүн бэлиэтээтибит! Бу күн Саха норуотугар биир тутаах, ытык суолталаах буолар. Сарсыарда Студсовет оҕолоро кэлэр үөрэнээччилэри, үлэһиттэри ырыа доҕуһуоллаах баҕа санаа саламатын баайтаран уруйдаан көрүстүлэр.

Күн ортото оскуолабыт үлэһиттэрэ оҕолорбутун, бары үөрэнээччилэри, саха сандалытын мааны аһынан – арыылаах алаадьынан уонна күөрчэҕинэн айах тутан күндүлээтилэр. Бу кэмҥэ араас оонньуу, үҥкүү-битии оройуттан тутулунна.

Дьоро күммүтүн киэргэтэн «Арктика култууратын уонна искусствотын Ил институтун» талааннаах устудьуоннара «Төрөөбүт тыл түһүлгэтэ» кэнсиэрдэрин бэлэхтээтилэр. Тыл уус-уран күүһүн, дьикти дьүрүскэнин көрдүбүт, култуура нөҥүө саха норуотун олоҕун-дьаһаҕын чугастык билистибит. Студеннары кытта саалаҕа олорооччулар хомус флешмобугар кытынныбыт, түмүгэр көрсүспүт күннээх түһүлгэбитин үөрүүлээх оhуохайынан түмүктээтибит.